Улсын нэгдүгээр төв эмнэлэг /УНТЭ/-ийн Дүрслэл оношилгооны төвийн цөмийн онош зүйн эмч нар Зүрхний төвийн эмч нартай хамтран “Зүрхний эмийн ачаалалтай SPECT/CT” (Adenosine Stress Myocardial Perfusion Imaging – MPI) шинжилгээг эмнэлзүйн практикт нэвтрүүлж, эхний хоёр тохиолдлыг амжилттай гүйцэтгэлээ.

Энэхүү шинжилгээг нэвтрүүлснээр зүрхний булчингийн цусан хангамжийг үнэлэх, цусны эргэлтийн дутагдлыг илрүүлэх, зүрхний ишемийн байршил, тархалт болон хүндийн зэргийг тодорхойлох оношилгооны шинэ боломж бүрдэж байна.

Тус шинжилгээ нь биеийн хүчний дасгалын ачаалал авах боломжгүй өвчтөнд аденозин эмийн тусламжтайгаар зүрхний булчингийн цусан хангамжийг үнэлдгээрээ онцлог юм.

Мөн шинжилгээний үр дүнг өвчтөний эмнэлзүйн бусад мэдээлэлтэй уялдуулан үнэлснээр эмчилгээний тактик болон цаашдын тусламж үйлчилгээний чиглэлийг оновчтой тодорхойлоход чухал ач холбогдолтой. Ийнхүү УНТЭ-ийн эмч нар энэхүү оношилгоог эмнэлзүйн практикт нэвтрүүлснээр зүрх судасны өвчний оношилгоо, эмчилгээний шийдвэр гаргалтад дэмжлэг үзүүлэх шинэ боломжийг бүрдүүллээ.