Хирошима хот атомын бөмбөгдөлтөд өртсөнөөс хойш 81 жил өнгөрч буйтай холбогдуулан өнөөдөр энх тайвны ёслол боллоо. Японы өнцөг булан бүрээс ирсэн хүмүүс толгой гудайлган зогсож, хохирогчдын дурсгалыг хүндэтгэв.

1945 оны энэ өдөр америкчууд атомын бөмбөг хаясан мөч болох өглөөний 08:15 цагт Хирошима даяар нам гүм болжээ. АНУ-ын B-29 Enola Gay онгоцноос "Little Boy" нэртэй ураны атомын бөмбөгийг хаясан байна.   Дэлбэрэлтээс үүссэн халалт болон цацраг идэвхт бодисын улмаас хот бүрэн сүйдэж, тухайн оны эцэс гэхэд ойролцоогоор 140 мянган хүн амиа алдсан билээ. Амьд үлдсэн олон хүн цацраг туяанаас үүдэлтэй хорт хавдар болон бусад өвчнөөр шаналж байв.          Ерөнхий сайд Такаичи Санаэ болон 121 улсын төлөөлөгчид энэ удаагийн энх тайвны ёслолд оролцлоо. Хирошима хотын дарга Мацүи Казүми цэцэрлэгт хүрээлэнгийн дурсгалын хөшөөн дэх атомын бөмбөгт өртсөн хохирогчдын жагсаалтыг шинэчлэн байрлууллаа. Түүн дээр 353 639 хүний нэр бичигдсэн бөгөөд үүнд өнгөрсөн 12 сарын хугацаанд нас барсан 4 393 хүний нэрийг нэмж сийлсэн байна.Мацуи цөмийн зэвсгийг устгахыг уриалсан энх тайвны тунхаглалыг уншиж танилцуулав. "Дэлхийн бодлого боловсруулагчид аа, цөмийн зэвсгийг нэн даруй устгахыг иргэний нийгэм  шаардаж байна. Та бүхэн бидний сэтгэлийг хэр удаан гонсойлгох вэ? Цөмийн зэвсэг хэрэглэх гэсэн аливаа оролдлого нь хүн төрөлхтөнд сүйрлийн аюул учруулна гэдгийг ойлгож байгаа биз ээ" хэмээн тунхаглалд өгүүлжээ.

Мөн Ерөнхий сайд Такаичи үг хэлж "Япон улс цөмийн зэвсэггүй байх гурван зарчмыг тууштай баримталж, атомын бөмбөгдөлтөд өртсөн цорын ганц улс гэдэг үүднээс цөмийн зэвсэггүй дэлхийг бий болгохын төлөө тууштай тэмцэх болно. Энэ бол бидний үүрэг" гэлээ.